E fa’apea le tala i le ulua’i to’oto’o ma le ulua’i fue. O le ‘Aiga Sa Tagaloa, sa iai le niu, sa ta’ua: O le niu fe’ai.
Sa vaea lenei niu e fai ma to’oto’o e pipi’i iai Tagaloa pe a lauga. O lenei niu e fe’ai lona tino atoa. E amata mai lava i le pogai e o’o lava i ona a’a.
Le niu lea na fetu’u i ai le tama o Lefanoga e le Aiga Sa Tagaloa ina ia oti ai. Peita’i, na a’e le tama ma tau lava i le tumutumu o le niu, ma fati ifo uma i lalo fua o le niu, e o’o lava I le ta’ale o le niu. Lea na mafua mai le alagaupu. “Ua fasitu’e le niu a Sa Tagaloa.
O le mea tonu na mafua ai le fue ma le to'oto'o, o le faiga o le saofa'i a Tagaloaaleniu. O le ulua'i matai foi lea i totonu o Samoa. O Manu'a na maua ai le to'oto'o ma le fue...O le niu na fai ai....ia masalo po'o se niu a le aiga Satagaloa. O lenei niu, sa ta'u o le niufe'ai, ae na maua lava le mea e tu ai le niu e Lefanoga le alo o le Tuimanu'a. Ona ia fasitu'e lea o le niu. Tusa la o le oganiu o le niu lenei, na ta ai le ulua'i to'oto'o lea sa fa'aaogā e Tagaloaleniu. Lea na fa'aigoa ai le to'oto'o o le "atipouniu". Ae o moia'a o pulu o le niu lenei, sa fatua'i ai fuati fue ma fili ai le 'afa e saisai ai le ‘au o le fue, ae o le fasila'au mai le oganiu sa fai ai le ‘au o le fue, ma faaigoa o le upega o lauga.